الذ واشهى كب كيك مقدم من نوهير شعبان

الذ واشهى كب كيك
مقدم من نوهير شعبان
* للكب كيك:
- 3 بيضات
- كوباية سكر
- كوباية دقيق
- 1/2 كوباية كاكاو خام
- 1/2 كوباية لبن رايب او زبادي
- 2 ملعقة زيت
- ملعققة صغيرة بيكينج بودر
- 1/2 ماعقه بيكينج صودا
- رشة ملح
- 1/4 كوباية شوكولاتة خام مبشورة
- ملعقتين كبار زبدة
علي حمام بخار نسيح الشوكولاتة الخام مع الزبدة ونحطهم علي جنب
وفي طبق غويط هنضرب السكر مع البيض والفانيليا والزيت لحد ما قوامهم يتقل وبعدين ننزل عليهم باللبن الرايب وبعدين ننزل عليهم بالدقيق مخلوط بالكاكاو والبيكينج بودر والصودا والملح واحدة واحدة ونقلب براحة من فوق لتحت هيتكون خليط تقيل شوية ننزل بالشوكولاتة والزبدة اللي سيحناهم ونكمل تقليب من فوق لتحت..
ونوزع الخليط في قوالب الكب كيك اللي حاطين فيها ورق الكب كيك وندخله الفرن على 180° لمدة 20 دقيقة ونختبرها ونلاقي الخلة طالعة نضيفة كدة بقت جاهزة نطلعها ونحطها على جنب تبرد خالص..

* للحشوة:
- 2 كوباية مارشميللو ابيض
- ملعقة زيت
- ملعقة صغيرة عسل
- ملعقتين ماية
- علبة كريمة حلويات
- 2 كيس كريم شانتييه
في كسارول على النار تسخن هنحط المارشميللو والعسل والماية والزيت ونقلب فيهم وبعدين نوطي عليهم النار ونستمر في التقليب لحد ما المارشميللو يبدأ يدوب هنشيل الكساورل مم علي النار ونكمل تقليب برة لحد ما المارشميللو يسيح خالص هنسيبه على جنب يبرد..
وفي طبق غويط هنضرب الكريمة السايلة مع الكريم شانتييه لحد ما قوامهم يتضاعف ويبقي متماسك منزودش في الضرب بعد ما نوصل للقوام المناسب عشان الكريمة متفصلش مننا..
وبعد كدة هنخلط الماشميللو مع الكريمة كويس ونحطهم في كيس حلواني او كيس بلاستيك عادي وندخلهم التلاجة ساعة..

طريقة الحشو 
هنجيب الكب كيك كله هنمسك واحدة واحدة نعمل فيها تجويف من فوق بالسكينة على شكل دايرة ونرفع هنلاقيه عمب حفرة والجزء اللي جوفناه طلع معانا بسهولة هنعمل فيهم كلهم كدة ونحط جنب كل واحدة الجزء اللي جوفناه منها عشان ميتوهش منها ونمسك كيس الحلواني اللي في الحشوة ونملا التجويف دة بالحشو اللي عملينه ونقص حتة من الجزء اللي جوفناه ونرجع الجزء اللي باقي فوق الحشوة عشان نسد التجويف دة زي ما موضحة في الصور..
كدة حشينا كدة الكب كيك وغطينا الحشوة بباقي الكيك..

للتغطيه
- كوب شوكولاتة مبشورة محلاه او خام براحتكو
- ملعقة زيت
نسيحهم على بخار ماية ونغطس فيها كل راس كب كيك ونحطهم في التلاجة عشان الشوكولاتة تمسك نفسها وبعدين نطلعها نعمل شكل التزويق اللي من فوق دة بنفس الحشوة بس في كيس حلواني مفتوح فتحة صغيرة خالص..

**ملحوظات:
- لو مفيش بيكينج صودا ممكن نستبدلها بمعلقة صغيرة بيكينج بودر
- كريمة الحلويات ممكن نستبدلها بلبن بس مش هتدي نفس الطعم الغني وهحطلكو صورتها في الصور
- لو مفيش لبن رايب او زبادي ممكن نستبدلهم ب1/2 كوباية لبن دافي زي دمعة العين وعليه معلقة صغيرة خل
- المارشميللو في الحشوة اها ضروري عشان يدي نفس الطعم بتاع هوستس اللي كنا بناكله زمان.. لكن لو مش حبينه او عايزين حاجة اسهل ممكن نكتفي بالكريمة وممكن تعملو بداله كريمة زبدة عبارة عن سكر بودرة وزبدة يتضربو كويس اوي سوا ونظبط القوام بمعلقتين لبن
- الكمية دي عملتلي 15 كب كيك بالظبط
مديرة مجلة فلفل شطه الشيف بوسى السيد