السينابون الخطيير مقدم من نوهير شعبان

السينابون الخطيير
مقدم من نوهير شعبان

المقادير:
- 2 ونص كوباية دقيق
- رشة ملح
- 1/4 ماء دافي
- معلقة صغيرة خميرة
- معلقة صغيرة سكر
- 100 مل لبن
- بيضة
- فانيليا
- 2 معلقة كبيرة سكر
- 2 معلقة زبدة او زيت

للصوص:
- 4 مربعات جبنة كيري او جبنة مثلثات
- 4 معالق كبار حليب مكثف محلى
- فانيليا
- معلقتين لبن

الطريقة:
بنحط الخميرة مع الماية الدافية والسكر واربع معالق دقيق وتقلبهم ونسيبهم 10 دقايق واول ما نلاقيها عملت فقاقيع كدة ونفخت
نحط عليها اللبن الدافي والبيض وكمية السكر التانية والفانيليا و1/2 كمية الدقيق والملح ونقلب هتبقي عجينة عاملة زي قوام الزلابية كدة هنغطيها ونسيبها تخمر ساعة وبعدين اخر حاجة هنحط باقي كمية الدقيق والزبدة ونعجن نفضل نعجن 10 - 15 دقيقة كدة لحد ما العجينة تنعم تماما هنخليها ترتاح 30 دقيقة..
وبعدين ناخدها نفردها علي دقيق بسيط نخلي سمكها رفيع بس مش اوي وبعدين ندهن الوش بزبدة طرية مش سايلة ونرش سكر بني مع ابيض وقرفة ونلف العجينة كلها وبعدين نقطعها بخيط لإنه بيظبط الشكل اكتر من السكينة كل قطعة طولها اد الصباع تقريباً ونرصها في الصينية مفروشة ورق زبدة وبينهم مسافة كويسة عشان بتنفخ اوي ونغطيها ونسيبها حجمها يتضاعف وبعدين ندخلها الفرن المتسخن علي 200 بتاخد حوالي 20 دقيقة واول ما تخرج نحط عليها الصوص..

الصوص:
نحط الجبنة وننعمها الاول بشوكة او بالمضرب لخد ما قوامها يسيح خالص نحط عليها الحليب المكثف المحلي والفانيليا ونقلب وبعدين نظبط القوام باللبن..


* الحليب المكثف المحلى
كوباية حليب بودرة نيدو او اي نوع وعليه كوباية سكر بودرة ناعم جداً وعليهم 1/2 كوباية ماية مغلية يتقلبو كلهم سوا مش بنرفعهم علي نار ولا حاجة هي الماية المغلية بتدوب كله في بعضه وممكن تحطو معلقة صغيرة زبدة بس انا مبحطهاش لإن بيقول تقيل لوحده وبيستخدم اصلاً في وصفات تقيلة مش محتاج
مديرة مجلة فلفل شطه الشيف بوسى السيد